आजचे ताजा वृत्त...

त्या पेपरमध्ये रोजच दिसतात मला

विकले गेलेले शब्द, विकलेले विचार;

लाचार मने, वाढलेली महागाई;

माजलेली सरकार, परेशान जनता...

पानोपानी ऐकू येतो मला रोज

त्या अत्यचारीत महिलेचा आक्रोश;

नांदा सौख्यभरे म्हणता म्हणता

त्याच सुनेचा सासुरवास म्हणून

हुंडयापायी होणारा तिला जाच, छळ;

शेजारी-शेजारी असा खेळ खेळताना

दिसतात मला.. ऐकू येतात..

वीतभर जागेवरून त्याच जागेवर..

होणारे भांडण, पडणारे मुडदे; त्यांचे विव्हळणे;

ती जागा पेपरची आता लाल झाली आहे..

तिच्या खूनाने; त्या जागेपायी गेलेल्या

त्या शेजार्‍याच्या लाल रक्ताने;

गरीब हा गरीबच होत आहे..

श्रीमंत हा श्रीमंतच होत चालला आहे;

अशी लूट चालवली आहे..

त्या एका माणसाने, त्या सरकारने;

चुटकीसरशी दाबले जातात प्रकरण त्यांच्या

भ्रष्टाचाराचे, त्यानी केलेल्या बलात्कारचे;

जनतेच्या लुटलेल्या पैश्याचे;

कागदोपत्री तक्रार दाखलपण होते;

खाली असतो एक शब्द..

आदेशावरून ******;

हाच असेल त्यांचा आदेश बहुतेक;

कालांतराने शब्दपण ते आता

शरमेने.. लाजून.. जातील निघून

दूर कुठेतरी, पसार होऊन;

आज परत..

मी वाचतो आहे तोच पेपर;

मला शब्दच दिसत नाहीत कुठे ?

दिसतो आहे तो फक्त एकच रंग..

लाल; लाल; लाल;

© आदित्य अ. जाधव...!!!